06 May 2024
കൊല്ലം: സംസ്ഥാനം മുഴുവന് കാര്യക്ഷമമായ പാലിയേറ്റീവ് കെയര് സേവന ശൃംഖലകള് സ്ഥാപിക്കുന്നതിലൂടെ വേദനയും ദുരിതവുമില്ലാത്ത കാരുണ്യ കേരളം എന്ന ലക്ഷ്യവുമായി രാജ്യത്തെ പ്രമുഖ പാലിയേറ്റീവ് കെയര് ശൃംഖലയായ ആല്ഫ പാലിയേറ്റീവ് കെയറിന്റെ നേതൃത്വത്തില് നടത്തുന്ന രണ്ടു ശില്പ്പശാലകള്ക്ക് കൊല്ലം ജില്ലയില് തുടക്കംകുറിച്ചു.
കൊല്ലം സി ഫോര് യു കോണ്ഫറന്സ് ഹാളില് നടന്ന ശില്പ്പശാലയില് ആല്ഫ പാലിയേറ്റീവ് കെയര് കമ്യൂണിറ്റി ഡയറക്ടര് സുരേഷ് ശ്രീധരന് ആമുഖ പ്രഭാഷണം നടത്തി. വിഷന് 2030 സ്റ്റേറ്റ് കോ ഓര്ഡിനേറ്റര് അംജിത്കുമാര് സ്വാഗതവും കമ്യൂണിറ്റി ഡവലപ്മെന്റ് ഓഫീസര് റോബിന് പോള് നന്ദിയും പറഞ്ഞു.
പാലിയേറ്റീവ് കെയര് വെല്ലുവിളികളും പരിഹാരങ്ങളും എന്ന വിഷയം ആല്ഫ ചെയര്മാന് കെ.എം.നൂര്ദീന് അവതരിപ്പിച്ചു. തുടര്ന്ന് ചര്ച്ചയും കമ്മിറ്റീ രൂപീകരണവും നടന്നു. കൊല്ലം കോര്പ്പറേഷനെയും സമീപപ്രദേശങ്ങളിലെ ഗ്രാമപഞ്ചായത്തുകളെയും ഉള്പ്പെടുത്തി പുതിയ ലിങ്ക് സെന്റര് തുടങ്ങുന്നതിനായി സബീന സലിം - പ്രസിഡന്റ്, രാജലക്ഷ്മി, ഷീജ എം- വൈസ് പ്രസിഡന്റുമാര്, പ്രീത മനോജ് - സെക്രട്ടറി, ബിന്ദു ശ്രീലാല്- മിനി എ.- വൈസ് പ്രസിഡന്റുമാര്, ജയലക്ഷ്മി- ട്രഷറര് എന്നിവരുടെ നേതൃത്വത്തിലുള്ള കമ്മിറ്റിക്ക് രൂപം നല്കി.
2030നു മുമ്പ് കേരളത്തിലെ എല്ലാ ജില്ലകളിലും ജനകീയ ഉടമസ്ഥതയിലുള്ള ലിങ്ക് സെന്ററുകളും ഹോസ്പീസുകളും സ്ഥാപിച്ച് അനാവശ്യമായി വേദനകളനുഭവിക്കാത്ത കേരള സമൂഹത്തിനായുള്ള ആല്ഫ പാലിയേറ്റീവ് കെയറിന്റെ പദ്ധതിയാണ് വിഷന് 2030.